依莉詩生活
恭喜發財！新年又到啦！祝大家「豬」事順心，心想事成！新年做咩好？今年年初一我依莉詩餵蚊，同大仁生活一家繼續去大埔林村許願節，掟吉許願兼掃街！
橫掃二十多檔香噴噴美食
同住年一樣大埔林村許願節喺大年初一正式開鑼！除咗喺許願樹前拋寶牒許願，同點蓮花燈祈福，最重要嘅節目梗係食得是福啦！同場嘅美食嘉年華，有約 20 多個熟食攤檔，唔止有止年好 Hit 嘅梳乎厘班戟，仲有拉絲芝士腸、波波腸、壽司腸，同幾檔乾貨攤位，好有新年氣氛㗎！
新年第一串：墨魚壽司腸
行過一轉之後，我哋一人揀一樣嘢食，點知大家揀嘅都係一碌碌嘅，今年仲唔掂過碌蔗！而全場最多人排隊嘅就係扮成日本小食檔嘅「長野之部屋」，當中嘅套餐好抵食，$60 就可以食到半條墨魚壽司腸、半條豚肉壽司腸、玉子燒同一口牛粒，比起單叫平好多。至於味道方面，豬肉壽司腸係台灣腸包糯米飯，似食緊大腸包小腸咁，非常香口。而玉子燒就比較厚實，一口牛粒煎得好似太耐。
▲ 半條墨魚壽司腸 + 半條豬肉壽司腸 + 玉子燒 + 一口牛粒 $60
新年第二串：韓式芝士拉絲腸
而家仲講拉絲芝士好似 Out Out 哋，不過算係今次最好食嘅小食！脆粉係星星形，香脆無太厚粉嘅感覺，芝士仲可以拉到超長?，食得又玩得！而腸仔有少少酸味，好有韓國風。
▲ 韓式芝士拉絲腸 $30
新年第三串：素海參豬肉串
鹹食蒟蒻真係第一次試，用蒟蒻做嘅素海素，原來調味之後質感同味道又真係幾似海參，彈彈下好搞笑，好似細個玩嗰啲彈彈球咁！不過入面啲豬肉唔多熟，真係生生猛猛，好彩佢肯換過畀我哋！
▲ 素海參豬肉串 $50
新年第四串：早晨之蛋卷腸
之前淘寶見過呢部早晨機，放條腸加隻蛋就做到一串串早餐，好似好得意，估唔到呢度都有得賣。蛋加腸，唔好以為啲味可以想像到，但啲蛋竟然有茶葉蛋味，腸都唔係廚師腸嘅味道，而係肉質很鬆很稀，完全超乎想像！
▲ 早晨之蛋卷腸 $30
新年必做掟吉放水燈
新年去林村，食飽有氣力掟吉！大家都知，誠心參拜後向樹許願，再拋上樹幹，唔跌落嚟就代表願望可以成真，而原本嘅許願樹比人掟得多已經就嚟枯，所以用嚟許願嘅都係假樹同膠吉。但唔理啦！咁難掟都畀你掟到上去，願望會成真嘅！
▲ 今年似乎加咗價，以往 $50 就買到膠桔 + 蓮花套餐，而今年要用 $100 先買到膠桔 + 蓮花 + 木心心情人鎖。
▲ 經過幾年嘅經驗，今年竟然可以一擊即中，仲拋到好高?！
新春特別班直達林村
同往年一樣，新年期間會有九巴特快線 63R 往來大埔墟站至林村許願樹 同 專線小巴特別班次 25K，從太和港鐵站接載乘客至林村許願樹。平日大家都可以喺太和站轉乘 64K 號巴士，至林村許願樹站落車。
特快專車 63R 服務時間及班次
2019 年 2 月 5 日至 12 日 (年初一至八)
2019 年 2 月 16 日, 17 日, 24 日, 3 月 3 日
官方網頁：http://www.lamtsuen.com/
香港許願節 2019
日期：2019 年 2 月 5 日至 3 月 3 日
時間：上午 9 時至晚上 7 時 (2 月 16 日至 19 日、2 月 24 日至 25 日上午 9 時至晚上 9 時)
地點：大埔林村許願廣場
Comments