依莉詩生活
對 90 後嘅我依莉詩嚟講，美少女戰士絕對係人生第一套迷上嘅卡通片！尖沙咀 The ONE 就喺今個暑假變成超夢幻嘅 Sailor Moon 月光傳說場景，7 大影相位、互動遊戲同限定店，再加埋點心化表嘅主題點心，一定引嚟好多粉絲朝聖！就等我帶大家睇睇有幾華麗啦！
影相位 1：美少女戰士經典主角現身夢想星河
「替月行道，儆惡懲奸!」呢句個個都識背，只要一走入 The ONE UG2 中庭就會聽到同樣熟悉嘅美少女戰士主題音樂，正個佈置都好夢幻呢！5 位最經典嘅主角以 1:1 雕塑現身，做得相當逼真，好像即刻擺個變身 Pose 一齊合照！
▲ 每個主角都有真人咁高，個個都係「美少女」嚟㗎 ^^！
影相位 2：豆丁兔與獨角馬
近排咁興獨角馬，無論甜品店定 Cafe 打卡位都無馬不歡。唔知大家仲記唔記得「Sailor Chibi Moon 小兔」喺夢中相遇嘅「獨角馬」呢？白色身驅加上粉色毛髮，又夢幻又有型！
影相位 3：同禮服幪面俠浪漫 Selfie
禮服幪面俠更加係大家兒時嘅夢中情人！今次佢亦企定定喺玫瑰庭園，等大家一齊浪漫 Selfie！咁近距離見到偶像，我都面紅紅呢！
影相位 4：巨型聖杯力量 Level up
除咗守護巨型「新月棒」，旁邊仲有巨型聖杯散發住無窮力量呢！亮面嘅設計亦好華麗精緻，放大咗都無失真㗎！
影相位 5：萌爆的倩尼迪公主 X 安狄美奧王子
中庭影咗好多靚影，都唔好唔記得落地下露天廣場呀！Q 版立體「倩尼迪公主」同「安狄美奧王子」喺到等緊大家㗎！大頭嘅公主真係超級可愛呢！
▲ 中間仲有大大個佢哋嘅訂情信物「星空音樂盒」，可愛又華麗！
互動遊戲 1：華麗星光傳贏 95 折限定店優惠券
影相之外，今次仲有互動遊戲同限定店。只要喺華麗星光傳說互動遊戲挑戰成功，就贏取「The ONE x Sailor Moon 期間限定店」95 折購物券一張！快啲進行外太陽系歷險旅程，召喚「天王遙」同「海王美智留」嘅華麗神器啦！
互動遊戲 2：月影時光打開時間之門
時間之門看守人「Sailor Pluto」同外太陽系戰士「Sailor Saturn」喺度守護時間之門。遊戲挑戰成功就可以打開時空之門，次次出現嘅動畫都唔同㗎！
▲ 只要為不同嘅 Sailor Moon 角色同配飾進行配對成功，時間之門就會打開㗎啦！
The ONE x Sailor Moon 月光傳說
日期：2018 年 7 月 22 日至 9 月 2 日(上午 10 時至晚上 10 時)
地點：香港尖沙咀彌敦道 100 號 (港鐵尖沙咀站 B1 出口)
Comments